ពិធីបុណ្យចូលឆ្នាំចិនក្នុងមនោរម្មណ៍របស់ប្រជាពលរដ្ឋខ្មែរ

ស្វាគមន៍ចូលឆ្នាំចិន

យើងតែងតែធា្លប់បានឮពាក្យមួយឃ្លា ដែលប្រជាជនខ្មែរនិយាយជា ញឹកញាប់ថា៖ «ពេលចូលឆ្នាំខ្មែរ ខ្មែរសែន ហើយនៅពេលចូលឆ្នាំចិន ខ្មែរក៏សែនទៀត» ឬក៏ពាក្យថា «សែនចិន ស្រវឹងខ្មែរ»។ តើវាជាទំនៀមទម្លាប់ដែលប្រជាជនខ្មែរត្រូវតែធ្វើឬ? យ៉ាងណាមិញ ពាក្យទាំងនេះ ស្ដាប់ទៅមិនចម្លែកទេ ពីព្រោះប្រជាជនខ្មែរតែងតែគិតថា ប្រសិនបើអ្នកណាមានស្បែកសម្បុរសបន្ដិច ពួកគេពិតជាជនជាតិខ្មែរកាត់ចិន។ ជនជាតិខ្មែរកាត់ចិនរស់នៅប្រទេសកម្ពុជា មានចំនួនច្រើនគួរឲ្យកត់សម្គាល់ដែលសឹងតែក្លាយជារបាយសាច់ឈាម ជាមួយអម្បូរខ្មែរតែ មួយទៅហើយ។ បើយោងទៅតាមអត្ថបទដែលបានចុះផ្សាយនៅក្នុងឆ្នាំ២០០៨ លើគេហទំព័ររបស់ Culturalprofile.net បានឲ្យដឹងថា ប្រជាជនចិនភាគតិចរស់នៅក្នុងប្រទេសកម្ពុជា មានចំនួនប្រមាណ ៥ម៉ឺននាក់។ ស្របពេលដែលឥទ្ធិពលចិន បានកំពុងតែរីកដុះដាលនៅកម្ពុជានិងពិភពលោកទាំងមូល យើងសង្កេតឃើញថា ការប្រារព្ធនូវប្រពៃណី និងទំនៀមទម្លាប់របស់ចិន បានក្លាយទៅជាទម្លាប់ដែលខ្មែរតែងតែប្រកាន់ខ្ជាប់នៅក្នុង រដូវកាលបុណ្យទានជាច្រើនរបស់ចិន ដូចជាការសែនក្បាលទឹក ពិធីសែននំអ៊ី សែននំព្រះខែ និងជាពិសេសពិធីបុណ្យចូលឆ្នាំចិនជាដើម។ វាត្រូវបានប្រារព្ធឡើងយ៉ាងអធិកអធម ប្រហាក់ប្រហែលនឹងបុណ្យចូលឆ្នាំខ្មែរផងដែរ។ បច្ចុប្បន្ននេះ យើងសង្កេតឃើញថា ប្រជាជនខ្មែរមួយចំនួនធំ ដែលមិនមែនកាត់ខ្សែស្រឡាយចិន ឬក៏ហៅថាខ្មែរសុទ្ធនោះ បានចាប់ផ្តើមអនុវត្តនូវប្រពៃណីរបស់ចិនយ៉ាងខ្ជាប់ ខ្ជួន ដោយពួកគេបានរៀបចំជាពិធីសែនព្រេនដែលមានម្ហូបអាហារ នំចំណីជាដើម។ ជាពិសេស ពួកគាត់ចង់សែនដូចជាជនជាតិខ្មែរកាត់ចិន ក្រែងលោអាចទទួលបានជោគជ័យក្នុងការរកស៊ី ឬក៏ធ្វើឲ្យជីវភាពមានការរីកចម្រើនដូចជាជនជាតិខ្មែរកាត់ចិន ដែរ។ ហេតុផលមួយទៀត គឺពួកគាត់ គ្រាន់តែចង់ធ្វើតាមគ្នា ដោយមើលឃើញផ្ទះក្បែរខាង មិត្ដភក្ដិ ឬក៏បងប្អូនសាច់ថ្លៃ ភាគច្រើន តែងតែរៀបចំពិធីនេះ ដូច្នេះពួកគេក៏ចាប់ផ្ដើមអនុវត្ដនូវទម្លាប់ថ្មីនេះតៗរៀងមក។ លោក ប៉ិច សុខនៅ ជាអាជីវករមកពីខេត្តម្នាក់ បានប្រាប់ឲ្យដឹងថា លោកមានគម្រោងរៀបចំពិធីសែនព្រេន នៅក្នុងឱកាសបុណ្យចូលឆ្នាំប្រពៃណីចិនខាងមុខនេះ។ លោកបានបញ្ជាក់ថា លោក និងក្រុមគ្រួសារ ជាជនជាតិខ្មែរសុទ្ធ ប៉ុន្ដែលោកតែងតែប្រារព្ធពិធីចូលឆ្នាំចិនដោយមានជំនឿថា វានឹងអាចជួយដល់ការរកស៊ីរបស់លោកឲ្យមានការរីកចម្រើន។ លោកសុខនៅ បានបន្ថែមថា៖ «ខ្ញុំបានទៅរកគ្រូមើល ហើយគាត់ក៏ឲ្យខ្ញុំរៀបចំសែនដែរ ទោះបីខ្ញុំមិនមែនជាជនជាតិចិនក៏ដោយ»។

កញ្ញា ឃុន នារតី បុគ្គលិកលក់គ្រឿងអេឡិចត្រូនិកម្នាក់ បានប្រាប់ថា កញ្ញាបានធ្វើពិធីសែនព្រេនចូលឆ្នាំចិននៅផ្ទះខ្លួនឯងអស់រយៈ ពេលជាង១០ឆ្នាំមកហើយ ដោយសារកាលពីមុន កញ្ញាធ្លាប់ទៅសែននៅផ្ទះបងប្អូន។ កញ្ញាបានបន្ថែមថា កញ្ញាជាជនជាតិខ្មែរ ប៉ុន្ដែដោយសារមានបងប្អូនកាត់សែស្រឡាយចិនខ្លះ ដែលពួកគេប្រកាន់ខ្ជាប់តៗមក រហូតដល់ចាប់ផ្តើមរៀបចំពិធីសែនព្រេននៅផ្ទះខ្លួនឯងតែម្ដង។ កញ្ញា នារតី បានបន្តថា៖ «ចូលឆ្នាំចិន ខ្ញុំក៏សែន ចូលឆ្នាំខ្មែរខ្ញុំក៏សែន ព្រោះវាជាប្រពៃណី និងជំនឿរបស់យើង។ ការសែនទាំងនេះ អាចជួយឲ្យខ្ញុំសម្រេចក្តីប្រាថ្នាបានដូចបំណង តាមរយៈការជួយរបស់ដូនតា»។ ចំណែកឯបុរសសម្បុរខ្មៅស្រអែមមាឌធំដំបង លោកម៉ម រិទ្ធា ដែលរស់នៅក្នុងសង្កាត់ចោមចៅ បានថ្លែងថា លោកទើបចាប់ផ្ដើមពិធីសែនព្រេនក្នុងឱកាសចូលឆ្នាំប្រពៃណីចិនតែ ប៉ុន្មានឆ្នាំមុននេះទេ។ លោកបានពន្យល់ប្រាប់ពីមូលហេតុរៀបចំពិធីនេះថា ទាំងមិត្ដភក្ដិ និងក្រុមគ្រួសាររស់នៅក្បែរខាង ពួកគេតែងតែធ្វើពិធីសែនព្រេនរៀងរាល់ឆ្នាំ ហើយពួកគេក៏មិនដែលខកខានក្នុងការអញ្ជើញគ្រួសាររបស់ខ្ញុំទៅ ចូលរួមពិធីជប់លៀងទទួលទានអាហារម្ដងណាទេ។ លោក បានបន្ដថា៖ «ឃើញដូច្នេះ ខ្ញុំផ្ដើមគិតដល់ការរៀបចំពិធីសែននេះតែម្ដង។ ម្យ៉ាងទៀត ខ្ញុំក៏ចង់អញ្ជើញមិត្ដភក្ដិ និងអ្នករស់នៅជិតខាង មកទទួលទានអាហារផ្ទះខ្ញុំវិញម្ដង ក្នុងឱកាសបុណ្យចូលឆ្នាំប្រពៃណីចិននេះផងដែរ»។ ជាទូទៅ ពាក្យថា ខ្មែរ និងចិន បានក្លាយជាភាសាមួយសាមញ្ញ និងបានផ្សារភ្ជាប់យ៉ាងស្អិតល្មួតទៅហើយ ពីព្រោះទំនៀមទម្លាប់ចិនទាំងនេះ បានចាក់ឫសគល់យ៉ាងជ្រៅទៅក្នុងសង្គមខ្មែរតាំងពីបុរាណកាល ម្ល៉េះ។ លំហូរនៃវប្បធម៌ សាសនា ទំនៀមទម្លាប់ប្រពៃណីពីសង្គមខាងក្រៅ គឺពិតជាមិនអាចជៀសផុតទេ ប៉ុន្តែអ្វីដែលគួរឲ្យបារម្ភនោះ គឺការទទួលយកមកអនុវត្តតាម ដោយមិនបានគិតពិចារណាលើចំណុចអវិជ្ជមាន និងផលប៉ះពាល់របស់វា។ បើយោងទៅតាមប្រវត្ដិសាស្រ្ដ បានឲ្យដឹងថា ប្រទេសកម្ពុជាមានទំនាក់ទំនងជាមួយចិនតាំងពីសតវត្សរ៍ទី៣នៅពេល ដែលប្រជាជនចិន ចូលមកធ្វើជំនួញនៅទីនេះហើយពួកគេបានធ្វើចំណាកស្រុកចូលមក ជាបន្តបន្ទាប់រហូតដល់វត្តមានលោកជីវតាក្វាន់នៅសតវត្សរ៍ ទី១៣។ លំហូរជនជាតិចិន បានបន្តមកដល់សម័យអង្គរ និងបានបន្សល់ទុកនូវពូជពង្សចិនរហូតមកដល់ពេលបច្ចុប្បន្ន។

លោក វង់ សុធារ៉ា អនុប្រធានដេប៉ាតឺម៉ង់ប្រវត្តិសាស្រ្ត និងជា សាស្រ្តាចារ្យសិលាចារឹកប្រវត្តិសាស្រ្តខ្មែរ និងអាស៊ីអាគ្នេយ៍ មានប្រសាសន៍ថា៖ «ចិនមានគ្រឹះវប្បធម៌រឹងមាំ មិនងាយនឹងទទួលយកវប្បធម៌បរទេសទេដូច្នេះពួកគេតែងតែ ប្រតិបត្តិអ្វីដែលជាអត្ដសញ្ញាណរបស់ខ្លួនជានិច្ច»។ លោកបានបញ្ជាក់ថា ខ្មែរដែលមានដូនតាចិន ហើយគិតថាខ្លួនមានជាប់សែស្រឡាយចិន ក៏ចេះតែប្រកាន់ភ្ជាប់នូវទំនៀមទម្លាប់របស់ចិននៅក្នុងផ្នត់ គំនិតរៀងរហូតមក។ ចំណែកប្រជាជនខ្មែរសុទ្ធមួយចំនួន បាននាំគ្នាប្រតិបត្ដិតាមប្រពៃណីចិន ដូចជាការសែនព្រេន ពីព្រោះពួកគេយល់ឃើញថា ខ្លួនប្រហែលជាមានដូនតាចិន ហើយសែនទៅក្រែងលោដូនតាជួយឲ្យមានបាននឹងគេ។ លោកបានបន្ថែមថា៖ «ការប្រកាន់ទំនៀមទម្លាប់វប្បធម៌ដែលមិនមែនជារបស់ខ្លួន នាំឲ្យប៉ះពាល់ដល់អត្តសញ្ញាណខ្មែរ នាំឲ្យសង្គមខ្មែរមិនសុទ្ធ និងមានការយល់ច្រឡំ មួយណាចិន មួយណាខ្មែរ តែវាជារឿងធម្មតាទេ ព្រោះវប្បធម៌តែងតែប្រែប្រួលជានិច្ច»។ ទោះបីជាយ៉ាងណាក៏ដោយ លោកប៉ូ សំណាង ប្រធានមជ្ឈមណ្ឌលវប្បធម៌ជាតិ និងសិលធម៌សង្គម ដែលធ្វើការលើកតម្កើងវប្បធម៌ បានឲ្យដឹងថា ការសែនចិន ជាសិទ្ធិរបស់ប្រជាពលរដ្ឋ ព្រោះច្បាប់ខ្មែរមិនបានហាមឃាត់ប្រជាជនក្នុងការជ្រើសរើសសាសនា ណាមួយឡើយ ដូចដែលបានចែងនៅក្នុងរដ្ឋធម្មនុញ្ញខ្មែរ។ លោកបានបន្តថា ការសែនចិន វាមិនប៉ះពាល់អ្វីទេ តែយើងត្រូវផ្សព្វផ្សាយវប្បធម៌ខ្មែរឲ្យបានទូលំទូលាយដល់ ប្រជាពលរដ្ឋខ្មែរទូទៅ។ ទាក់ទងនឹងអប្បិយជំនឿនៃការសែនព្រេនរបស់ជនជាតិចិន អាចជួយឲ្យពួកគេមានការរីកចម្រើនក្នុងគ្រួសារ លោកបានបញ្ជាក់ថា៖ «វាជាអបិ្បយជំនឿទេ សំខាន់យើងត្រូវចេះជួយខ្លួនឯង ដោយខិតខំរកស៊ី បង្កើតជំនួញដោយខ្លួនឯង។ ក្នុងនាមជាពលរដ្ឋខ្មែរ យើងត្រូវយល់ និងស្គាល់ពីវប្បធម៌ ប្រពៃណី និងទំនៀមទម្លាប់ខ្លួនឲ្យបានច្បាស់សិន មុននឹងចាប់យកវប្បធម៌ដទៃ»។ លោក ក៏បានស្នើថា៖ «ប្រជាពលរដ្ឋខ្មែរ ត្រូវតែប្រុងប្រយ័ត្នលើការចាយវាយ យើងជាខ្មែរ កុំចេះតែចំណាយថវិកាដូចជនជាតិចិននោះទេ»៕

ប្រភព http://www.postkhmer.com

Pages

ចែករំលែកជីវិតប្រចាំថ្ងៃ

ប្រភេទ

Monday, January 23, 2012